Такім чынам, за дыскрэдытацыю Беларусі цяпер можна будзе патрапіць за краты?.. Вось толькі ці ўдумваліся аўтары закона, што насамрэч значыць само гэтае слова?
Вельмі сумняюся, што эўрапейскія ці амэрыканскія структуры робяць свае высновы аб становішчы ў нашай краіне выключна па ацэнках нашых апазыцыйных палітыкаў ці грамадскіх дзеячоў.
Чытаць далей…

Баскэтбол у Амэрыцы – гэта big thing. Прыгожа, маштабна, забаўна. Вялікі стадыён Dean E. Smith Center, ці як яго празвалі “Dean Dome”, ня быў запоўнены цалкам напэўна таму, што на Thanksgiving амэрыканцы часта едуць, каб спаткацца са сваімі сваякамі, пашыранымі сем’ямі (extended families). З Чэйпэл Гілу зьехала на кароткія вакацыі шмат студэнтаў.
А шкада, бо гульня была цікавай. З нашай унівэрсытэцкай камандай сутыкнулася на полі каманды Санта Барбары. Госьці паказалі ўпэўненую гульню на пачатку, хоць ніколі і ня вырываліся наперад, але пад канец матчу пачалі саступаць. Нашыя “Tar Heels” падарылі гледачам некалькі сапраўды прыгожых баскэтбольных момантаў. Напрыклад, цудоўны трохачковы кідок на апошняй хвіліне.
Баскэтбол у UNC сапраўды спорт № 1. Ня дзіва, бо тут вучыўся Майкл Джордан, а ў мінулым годзе ўнівэрсытэцкая каманда стала чэмпіёнам краіны. Сёлета зьмяніўся склад – далучыліся чатыры новыя гульцы, але “Tar Heels” працягваюць ўпэўнена рухацца наперад.
Падтрымаць жа сваю home team – сьвятая справа студэнта. Па прадукцыі і продажы ўласнай сымболікі UNC ня мае роўных сярод унівэрсытэтаў. Заля была ў большасьці запоўненая людзьмі ў блакітным (колер нашага ўнівэрсытэту). Матч скончыўся патрыятычнай каралінскай песьняй.

Злучаныя Штаты сьвяткуюць Thanksgiving Day – час спаткацца зь сям’ёй, сваякамі, спыніцца на хвіліну, адысьці ад штодзённых клопатаў, час паразважаць аб вечным. Чэйпэл Гіл сёньня пакідае багата студэнтаў, якія едуць да сябе дамоў на выходныя. Чытаць далей…

Polski Ośrodek Studiów Wschodnich u vieraśni vypuściŭ spravazdaču «BIAŁORUŚ - NIEZNANY SĄSIAD UE. Sytuacja polityczna, społeczna i gospodarcza Białorusi». Rapart dastupny na aficyjnym sajcie pa-anhielsku, polsku, niamiecku i francusku. Чытаць далей…

Прабіў час Х. Дзяржава адмахнулася ад аўтарытарнае эры і пачала намацваць новы (альбо ня надта новы) для сябе пэрыяд. Таталітарызм прыйшоў зьнянацку, хоць гэта і прадказвалі, хоць многія дагэтуль яшчэ слаба асэнсоўваюць тое, што адбылося. Чытаць далей…

У чэцьвер на кампусе UNC прамаўляў былы рэдактар ізраільскай англамоўнай газэты “Jerusalem Post” Карл Шраг. Выдатны харызматычны выступоўца, якім ён несумнеўна зьяўляецца, казаў пра асьвятленьне ізраільска-палестынскага канфлікту ў СМІ. Чытаць далей…

Учора ў Амэрыцы былі выбары. Нью-Джэрсі і Вірджынія прагаласавалі за губернатараў-лібералаў, а Нью-Йорк пераабраў рэспубліканца Блумберга на другі тэрмін. Каліфорнія “пракаціла” прапановы Шварцэнэгера – “тэрмінатар” ня так упэўнена трымаецца ў палітыцы, як у кіно, дзе Шварц амаль заўсёды непераможны.
У Чэйпэл Гіле пытаньнем нумар адзін на выбарах быў рост унівэрстытэту і ўзаемадачыненьні UNC і гораду. Яўка была нізкая. Дзень выбараў быў працоўным, ды і не сказаць, што шмат народу праяўляля вялікую ахвоту ісьці на выбарчыя ўчасткі. Куды больш важныя выбары чакаюцца ў наступных годзе, так званыя “mid-term elections”, на якіх будзе вырашацца, якая партыя будзе мець большасьць у Палаце прадстаўнікоў і Сэнаце, а таксама будуць вызначаныя новыя губэрнатары ў 36 штатах.

Узламалі сайт Рэсурсовага цэнтру “Барміца”. Падобна на тое, што гэта справа рук не беларусаў, а хутчэй за ўсё бразыльскіх хакераў. Для іх гэта забава. Магчыма, трэніроўка перад нечым больш масштабным.
Чытаць далей…

Колін Паўэл выступіў на адкрыцьці новага будынку Сэнфардскага інстытуту Д’юка, у Дураме. Народу было не прабіцца. Усе 1200 месцаў ў аздараўленчым комплексе ім. Ўілсана былі занятыя. Па ацэнках “Herald Sun” ня меней людзей чакалі на вуліцы. Паўэл сабраў гледачоў бы рок-зорка. Ня дзіва. Шмат хто хацеў бы бачыць мінулага дзяржсакратара Амэрыкі наступным прэзыдэнтам.
Вось урывак інтэрвію Коліна Паўэла Нацыянальнаму грамадскаму радыё NPR:
“У мінулым годзе я спаткаўся з групай бразыльскіх студэнтаў, што прыехалі ў Амэрыку па абмену і правялі тут некалькі тыдняў. Я папрасіў, каб яны распавялі пра свой досьвед у нашай краіне. Адна дзяўчына распавяла, што аднойчы 12 студэнтаў пайшлі ў фаст-фуд рэстарацыю ў Чыкага. Яны павячэралі і тады зразумелі, што ў іх не стае грошай заплаціць за рахунак. Ім бракавала шмат. Напуджаныя, яны нарэшце сказалі пра сваю сітуацыю афіцыянтцы. Яна адыйшла, хутка вярнулася і сказала: “Я паразмаўляла з мэнэджэрам і ён сказаў “Усё добра”. Студэнты ўсё яшчэ былі ўстурбаваныя, бо яны думалі, што ў афіцыянткі вылічаць нястачу з заробку. Яна ўсьміхнулася: “Не, мэнэджэр казаў, што ён рады, што вы тут, ў ЗША. Ён частуе”.
І гэту гісторыю пра Амэрыку бразыльскія юнакі распавядалі шмат разоў. І гэта Амэрыка, ў якую я веру. Гэта Амэрыка, у якую хоча верыць сьвет”.

Амэрыка сьвяткавала Хэлоўін. У Чэйпэл Гіле па ацэнках паліцыі ў цэнтры гораду “бясіліся” 50 тысячаў дэманаў, монcтраў, пачвараў і жывёлаў. Амаль як у Бабруйску . www.babruisk.com стаў фактычна хоўм пэйджам “ньюсьпіку” сучаснай інтэрнэт генэрацыі постсавецкага сьвету. А Чэйпэл Гіл стаў месцам найбольшага фэстывалю Хэлоўіну ва ўсіх паўднёва-усходніх штатах Амэрыкі. Сьвята нібыта падонкаў і жывёлаў, але ёсьць у ім і сямейны прысмак. “Trick or treat” – файная традыцыя, калі дзеці ходзяць па кватэрах і пужаюць гаспадароў. Дэманчыкаў трэба ўлагоджваць цукеркамі.
Людзі традыцыйна апраналі маскі герояў сваіх улюбёных фільмаў і мультфільмаў, а таксама палітыкаў. Былі і групавыя выступы і танцы: піраты, прыхільнікі Харэ Крышны, трусы (як з Плэйбою). Паглядзець рэпартажы са сьвяткаваньня можна на сайтах лякальнай прэсы. Невялічкі відэасюжэт пра Хэлоўін у Чэйпэл Гіле ёсьць на сайце газэты “News & Observer”.
Беларускі “Хэлоўін” фігуральна адбываецца штодня. Зусім ня весела цяпер Міколу Астрэйку, Аляксандру Бондараву і Эніры Браніцкай, каторыя знаходзяцца у спэцпрыёмніку-разьмеркавальніку на вуліцы Акрэсьціна, дзе адбываюць арышт, бо спрабавалі правесьці ўстаноўчы сход і зарэгістраваць “Партнэрства” афіцыйна. Незарэгістраваная ініцыятыва мае на мэце незалежнае назіраньне за выбарамі. Але такое, як бачым, ўладам не патрэбна.
Скончыць хочацца на высокай ноце: Бжэзіньскі заявіў, што Беларусь войдзе ў Эўразьвяз. У пэрспэктыве. Вось толькі колькі гэтую пэрспэктыву чакаць давядзецца?